|
Nú er sáning í gulrófnaakrana langt komin, en að venju er hér ekki sáð í allt garðlandið í einu til að minnka áhættu. Kuldakast eða snarpt næturfrost getur eyðilagt plönturnar þannig að þær tréni eða blómstri o.s.fv. Eftir hlýindi í lok mars og fram eftir aprílmánuði hefur kólnað og nú síðustu vikuna oftast næturfrost. Þetta er reyndar ekkert einsdæmi í íslenskri veðráttu og verður því að taka áhættuna, því mikilvægt er að geta boðið upp á nýjar rófur snemma sumars, sérstaklega nú þegar íslenskar rófur frá fyrra ári eru ekki til lengur.
Veiðin í Ölfusá fer hægt af stað þó aðeins séu menn farnir að verða varir. Vænta má að veiði fari að glaðna þegar líða tekur á maímánuð, er hlýna tekur.
Sama er að segja um veiðina í Varmá og Þorleifslæk. Veiðin þar hefur verið frekar dræm, en oftast hefur hún verið góð í apríl. |
|
|
 Nú er garðvinnan hafin á Hrauni, fyrsta sáning ársins framkvæmd í gær, 4. apríl. Frost var mjög lítið í jörð þennan veturinn og nú víðast farið úr hér um slóðir. Garðlandið þurrt, því er freistandi að setja niður þó enn sé líklegt að frost geti skaðað plönturnar.
Akríldúkurinn hlífir plöntunum og flýtir sprettunni. Við nutum aðstoðar strákanna „okkar“ eins og við köllum dóttursynina. Gott er að hafa margar hendur ef hemja þarf dúkinn þegar blæs eins og í gær. |
|
Súla er fallegur sjófugl , og er unun að horfa á hana stinga sér eftir æti, úr allt að 40 metra hæð. Hún sést oft hér við Ölfusárósa og stundum þegar mikið æti er úti fyrir ósnum getur verið mikið fjör. Við bændurnir hér á Hrauni vorum í eftirlitsferð hér með Ölfusá, nokkru fyrir ofan ósinn, er við sáum súlu sem flækt var í netadræsu. Náðist hún ósködduð, því efrtir að búið var að leysa hana og hún leyft stutta myndatöku, þá flaug hún sinn veg. Þetta minnir okkur á að ruslið sem við hendum frá okkur er ekki bara lýti á umhverfinu, heldur ógnar það einnig lífríkinu. Ótrúlegt rusl rekur enn á fjörur landsins og er að sjá að það eigi mest rætur að rekja til fiskiskipa landsmanna. Rusli er í mörgum tilfellum hent í sjóinn í stað þess að landa því og farga á löglegan hátt. |
 Eins og fram kemur hér á síðunni er hrossarækt hluti af starfsemi Hraunsóss og er ræktunin kennd við Hraun. Aðeins tvö kynbótahross, Þöll á 4 vetri og Vigdís á 6 vetri eru í tamningu, báðar hjá Jóhanni á Neðra Seli. Þöll er undan Hróði frá Refstöðum og Þrá frá Hofi, Þrumudóttir, sem er sameign með Erni á Hofi. Vigdís er Þóroddsdóttir undan Vakningu frá Víðidal.
Síðan eru tveir geldingar í tamningu í Hrísdal, sem Ásdís og Siguroddur bústjórar og tamningamenn sjá um að temja. Þeir eru Bylur, á 4 vetri, undan Stála frá Kjarri og Bylgju frá Garðabæ og Köngull, á 4vetri, undan Þóroddi og Könnun frá Kirkjubæ.
Hér er Þöll í sinni fyrstu „sýningu“.
Nýverið var gerð úttekt á tamningunni. Köngull sem er lengra kominn lítur út fyrir að geta orðið liðlegur reiðhestur, en óvíst er með Byl sem skemmra er á veg kominn.
Danskar mæðgur hafa sýnt áhuga á að kaupa Þöll, skoðuðu hana og hrifust af henni. Hún sýnir orðið góða takta, rúm á tölti og brokki, hefur góðan vilja og þjálni. Bygging verður yfir fyrstu einkunn og vonandi ríflega það. Eftir gott tilboð kann að vera að hún verði seld.
|
|
|
|
|
<< Fyrsta < Fyrri 1 2 Næsta > Síðasta >>
|
|
Síða 1 af 2 |
